250
vnnd zu gemeynem pestenn vnnsers beruffs warten sollenn. Hoffenn auch, wy wir darumb emsig pittenn, Er werde hinfurder zu seines Namens Ehre, Nutz vnnd Aufnehmenn Lande vnd Leutte vnd gemeyner Christennheit mit zu guttem gnedigst vorleyhenn, wie wir auch nicht zweyfellnn, Das er diszen hochbeschwerlichenn krigssachenn gnedigst abhelffenn vnnd obsein wyrdet, Das die hendel on fernner bluthuorgiesszenn vnnd beschwer abgehenn werdenn, Derhalben dann vnnser vnnd aller Christen gepeth treulich Annhaltenn soll. Der Allmechtige wolle euch seiner heiligenn kyrche zu trost vnnd gutten zu langenn zeitten frysten vnnd aller beschwer gnediglich erleddigen. Vnnd woltenn euch solchs Als vnnserm besunder liebenn, dem wir Jderzeit mit gnaden gneigt, gnedigst nicht vorhaltenn etc. Datum vtsupra. Under samme Dato tilskriver Kongen Melanchton et Tröstebrev i Anledning af Krigsforholdene i Tydskland og oversender ham 50 Daler. 29. An doctor Jonas ein trostbrifflein. Actum Coldingenn denn 30ten decembris Anno etc. 46. 1546, 30 Decbr. Christian etc. Vnnsern gnedigstenn grusz zuuornn. Wirdiger vnnd hochgelarter besonnder lieber. Wir habenn aus vnnsers Auch besunder liebenn Ern Philippi Melanchtonis schreybenn, Auch sunst aus ann vnns gelangtenn zeyttungenn vornhommen, Wilcher massenn vnnser Oheim herzog Moritz die Churfurstlichenn lande eingenhommen, Vnnd wy mit der Stadt Halle vorfarenn, der Jr vortryben wordenn. Nun Jst vns solchs beynebenn denn hochbeschwerlichenn krigssachenn, Als Jm Ober Deutschlannde angestellet, vhast schmertzlich zuhorenn gewesenn, Tragen Auch derhalbenn ein besunders mitleydenn vnd woltenn, das wir denn hendeln zu guttem wesz furzuwendenn wustenn, daran solt vnnser getrewer vleisz vngespart pleybenn. Wir hoffenn aber vnnd sind zu dem Allmechtigenn vortrawenns, der werde gnedigst vorleyhenn, das ohn fernner christlich Bluthvorgiessenn die Sachen zu guthem vnnd fridlichem ende zugelangen vnnd dem Erbfeindt Christlichs glaubenns vnnd Nhamenns dem Turgkenn zu vnchristlichem furhabenn, wie sonst zubesorgenn, hiedurch nicht weytter vrsach gegebenn. Vnnd wirt der Allmechtig, wy darumb embsig zupitten, des Auch kein zweiuell, sein Kyrch erhalten vnnd derselbenn eynenn Raum vberlassenn, dahien sie zufliehenn vnnd erredtet werde, Auch euch vnnd anndere der Kyrchenn gliedmasz der Jtzigen Last, Bekummernisz vnnd beschwerunge gnedigst erleddigenn vnnd nicht trostlosz lassenn vnnd die Jtzt zerstrewte Kyrch vnnd Lobliche Schull zu Wyttembergk mit freudenn widderumb zuhauff vorsamlenn. Wir wollenn auch als eyn bekenner Götlicher Leher, des heyligenn Euangelij vund der Angenhommen warheyt, darbej wyr mit Gotlicher hulff vnnd vorleyhung pisz in vnnser Gruben zuuorharrenn vnd vns
