252
thaler, als wir euch Jarlich vorschriebenn, vnd wollet die zugefallenn habenn. Wolten euch solchs gnedigst nicht vorhaltenn, Vnnd sindt euch, in des Christlich gebet wir vns, vnnsere vielgeliebte gemahell, Junge herschafftenn, Reich, lande vnd Leuth hiemit empfolenn wollenn haben, mith Fernernn vnd Besondernn gnadenn geneigt. Datum vtsupra. 31. An Philipo Melanthon vnd Doctor Pommer, belangen das sie Ko. Mat. Jren zustandt zum offtern vormelden wolten vnd muglichen vleis furwenden, damit Jre Mt ein oder zween gelerte Theologen zu behueff der vniuersitet zu Coppenhagen Anhero vmb tregliche pension bekommen muchten. Datum Coldingen den letzten Marcy Ao etc. 48ten. 1548, 31 Marts. Christian etc. Als wir nun Jn langer zeit kein schreiben von euch Empfangen, haben wir aus gnedigster Neigung nicht wollen vnderlassen vns euwers zustandts hiemit zuerkunden. So es euch auch allenthalben wolfehrig ergehet, wie wir zuuorsichtig, Das erfahrn wir gern, Vnnd haben euch pillig zubeschuldigen, Das Jr vns nicht zum offtern mit euwern schreiben belangt, weil doch an Botschafft nicht erwindet, Jr wisset auch, das vns daran zu gueten gefallen. Wir vormercken auch aus Allen vmbstenden, das euch ahne zweiffel Jn diesen geschwinden zeiten allerley obleyt, Vnnd wirt vnsere wahre Christliche Religion durch allerley Mittel vhast gedrungen. Der herr wirt aber sein heylige kirche vnd derselben glidtmassen getreuwe hirten vnnd diener mit gnaden stercken, Trosten vnd erhalten, Darumb auch hoch zu pitten, Vnnd mussen auch die Geystlichen vber dem Concilio selbs widderig sein vff das ann mittel nicht zuerwinden. Vnns ist auch vor wenig tagen ein Schrecklicher abvhal angelangt etzlicher vieler predicanten, so die des Nhamen wirdig an der Pfaltz gesessen, die vnser wahre Christlich vnd Seligmachendt Religion widderruffen vnd alle vorige miszbrauch widderumb zuhalten Angenhommen haben sollen. Der herr wirt sie Richten vnd nach vordienst straffen. Vnnd wolle der Barmhertzig vnd guetig gott die seinen gnediglich behueten vnd vor aller widderung schutzen vnd handthaben, daran auch kein zweiffel zu haben. Wir gesinnen auch gantz gnedigst, Jr wollet vns alle gelegenheit vnnd zustandt der vorstehenden handlunge vnser Christlich Religion betreffen, die dannoch vnsers erachtens mit euwern vorwissen vnd getreuwen Rath vortgesetzt, souiel thuelich zuuormelden vnbeschwert sein, Das wir vns desselben sampt den vnsern nach gelegenheit vnd befindung als glider der heyligenn kirch Teylhafft zumachen. Vnnd als vnsere vniuersitet zu Coppenhagen, dadurch gott lob Jnn diesen vnsern Reichen viel guets schafft, Jtzt zween gelerter Theologen Anich, einer Doctor Olaus genant, der vor wenig Tagen zu einen Superadtendenten Jn wenszheusel beruffen worden, daselbst der gemeyne vortzustehen (Jst euch
