254
Wolttenn euch solchs als vnnsernn besondernn liebenn gnedigst nicht vorhaltenn etc. Datum vtsupra. 33. An doctor Pomerano. Actum Coldingen den viijten Nouemb. Anno etc. xlviij. 1548, 8 Novbr. Christiann etc. Vnsern gnedigsten grus zuuorn. Wirdiger vnd hochgelarter Besonder lieber. Wir haben euwer schreiben bey vnserm diener Andresen von Eulenow aus wittenbergk den dreitzehenden Octobris gethan Empfangen vnd gnedigst vornhommen. Thun vns euwer Neygung vnd das Jr vns vnd den vnsern gesontheit vnnd wolfart gonnet vnd von dem Almechtigen erpitten helffet, mit gnaden bedancken. Vnd wiewol nicht an, das wir durch gottes gnedige schickung zu etzlichen Maln mit leibes schwacheit beladen gewesen, Auch vast hart darnidder gelegen, So hat vns doch der Almechtig Barmhertzig vater vnsers einigen mitlers heilandt vnd erlosers Jesu Christj noch bis Anhero gnediglich gefristet, vnd werden durch desselbigen gnedige vorleyhung Auch Jtzo in gueter gesuntheit erhalten, dem hern, dero sein geschepf vnd Creaturen kennet, sei danck vnd lob. Der weis was vns gut Jst, der wirt Auch seinen gnedigen willen an vns erzeigen, Deme wir mit Aller gedult vnd gottes Frucht wollen vndergeben sein. Vnd wirt der Almechtig sein kirch erhalten, Auch mittel finden, die Ausser Menschen vorstande. Souiel aber wir vnser person vnd obligenden Ambts halben, Als vns von dem Almechtigen gnediglich vorlihen, thun konnen, was zu furdrung des Alderhochsten Lobs, ehren vnd Ausbreitung seins worts, Auch zum schutz der gotseligen Christlichen lehr vnnd kirchen, Dartzu erkennen wir vns als ein vnberumpter Christ vnnd der Christlichen Kirchen glyth schuldigk. Wollen auch vnserm Schepper vnd heylandt mit desselben gnedige vorleyhung das seine geben vnd sonst der welt das Jre thun, Vnnd seinnt von gantzen hertzen erfreuwet, das wir bey euch vnd Jn euwer Kirchen vnnd Schulen die Reine Lehr von gots gnaden noch erhalten horen. Der her vnd Almechtig ewig gott wolle zu seinem vnuorgencklichen lob vnd Ehren vnd erhaltung seins worts sein Milte gnad vorleyhen, Darumb wir Empssig pitten. Der endtschuldigung des nicht schreiben, Darumb wir euch Angeclagt, were nicht Notig, Vnd ist nichtt dahin gemeint, das wir derwegen an euch einigen zweiffel hethen vnd nicht wusten, das Jrs nicht gern thetet, Sondern das Jr Auch vnser gnedigst Neygung vnd vnser vorlangen nach euwerm schreiben vnd des hern Philippi, das vns jdertzeit Angenhem, zuerspuren. Vnd wirt der Almechtig euwerm pitten vnd. wonschen Nach Friedt vnd guete zeit ein mahl vorleyhen, Das Alle Fromme Christen sich erfreuwen werden. Das widderspiel vorursachen vnser Sunde, Darumb mugen wir die vordiente Straffe mit gedult vberwinden. Der herr weis sein zeit.
