258
38. Antwort Ann doctor Johan pomer zu Wittenberg, doctor drachoniten, Magister Nicolaum von Cothen mit vberschickung seiner pension belangen. Actum Rothschilt den xx senn, Septembris Anno 1551. 1551, 20 Septbr. wir- Christian etc. Vnnsern gnedigstenn grues vnnd genaigten willenn zuuorn. diger vnnd hochgelerter besonder lieber. Wir habenn eur schreibenn bej diesem botenn Scherff den 17 Augustj datirt denn andern dits monets empfangenn vnnd gnedigst vermergt, wie die Religionn sachenn der ordt stehenn, vnnd was des Concilij halbenn gemelt vnnd sonderlich, das von euch zu wittemberg vnnd andernn mer das Concilium vff verfaste Confession, so vonn vilnn theologenn vnterzeichent, zubesuechen beschlosmit fernner anzeige, das ir etzlich mal ann vns geschriebenn, aber des Nicolaj vonn Cothen vnnd doctorys drachonitis halben khain antwort empfangen, derwegen ir nicht wist, ob vns die schreiben vhorpracht oder wir bewegen gehapt hettenn darauff zuantworden etc. Mugenn euch hinwider gnedigst nicht vorhaltenn, das wir gern gehördt, das mit bestendigem grunde vnnd eintracht einhelige bekhantnus vnser heiligenn vnnd seligmachenten Religion gethonn werde. Wir sint auch nicht weniger genaigt mit gottes hilff vnnd verleihunge bej der gotlichen warheitt vnnd dem seligmachenten Euangelio vnsers erlossers Jesu Christj zuuorharn, Darzu bittenn wir auch sampt allenn fromen Cristen des almechtigenn hulff vnnd gnadt. das ir auch vns vnd die vnsern in euerm gebett stetigs hapt, des sint wir gnedigst danckbar, vnnd wirdt ahn zweiffel solch euer Christlich gebett nicht vnerhordt bleibenn. wir beuhelnn euch die kirch vnnd schulenn zu wittemberg sampt allenn glaubigenn Christen dem Schutz gottes Jeder zeitt hinwider. Souil belangen das ir ann vnns eines gelertenn Mans mit Namen Niclaus vonn Cotenn geschribenn, des wissen wir vnns nicht zuberichtenn. doctornn drachoniten haben wir anzunemen bewegenn, woltenn denselbenn sonst noch wol bekhomen. das ist die vrsach das wir euch der beittenn Menner halben nicht beantwordt. Wir werdenn aber bericht, das in denn oberlandenn vnnd sonst der ordt noch etzlich gelertt vnnd trefflich leuth vorhandenn, die mit gefar sich dar erhaldenn, als Brentzius vnnd mehr andere. wo nun Brentzius oder sonst ein feiner Christlicher gelertter man oder zwenn zubekhomen, die Christlichs wandels vnnd Lebenns seyenn, die wolttenn wir nicht vngernn habenn vnnd wol vnterhalten. So dernn ein oder zwenn zuerlangen, wollet Jr vnns dasselbe wissenn lassen, darauf wollenn wir euch vnser meinung zuschreibenn. Wir habenn allerlej bewegen, die jenigen, so nicht sonderlich bekhant oder sonst Jrer lehr vnnd lebenns halbenn verdechtig vormergt, wiewol niemants gantz volkomen zufindenn, anzunemen, dan wir sehen, was durch etzlicher vnnotige vnnd eigennsinnig disputaciones beschwerlich erregt vnd eingefurdt. Magistrum Rorarium habenn wir bestalt, das er fridlich, vnnd habenn euch durch vnsernn liebenn
