260
zutragenn wirdt, vnndbeschwerdt vormelten. wir beuheln vnns, die vnsernn vnnd vnser Reiche, landt vnnd leuth Jn euer vnnd der Kirchenn zu wittenberg Christlich gebett Vnnd seindt euch mit gnadenn vnnd guethem geneigt. Datum. 1): 1551. 40. Antwortt dem Mathematico doctornn Ambrosio Magiro vonn deuenter gebenn, als Kon. Met. Almanach vberschickt. Actum drottingburg denn 31 decemberis. Christian. Wir habenn euer schreiben vnnd vbersandt almanach zu gnedigstem vnnd guethem gefallenn empfangenn, wollen auch solch euer erzeigung mit gnadenn bedenckenn. Vnd dar Jr vnns was zuuormeldenn oder anzuzeigenn, daran vnns gelegen Vnnd das vnns zu wissenn nöttig sein möcht, vff vnsernn Costenn vffs schirst zu euer gelegenheitt bej einer vertrauten person schriefftlich oder Muntlich zuberichtenn, das soll auch bej vnns Jnn geheim wol behaltenn werdenn, Vnnd euch in dem vnbeschwerdt erzeigenn. das seind wir mit gnadenn vnd allem guethenn vmb euch zubeschuldenn geneigt. Datum. 41. An Doctor Görgium Maiorem, das er die Condicionn zum Supperattendenten zu Schleswig annhemen wolle. Actum drottningburg denn 8 Januarij Anno etc. lijten. Christian etc. Nachdem in vorgangnem Sommer nach willenn des almechtigenn der erwirdig vnser Rath lieber andechtiger vnnd getreuer Er Tilman Bischoff vnd Superattendent vnser Stiefft kirchenn Schlesewig aus disem lebenn Jn gott verschiedenn ist, Vnnd die Kirch also bis daher eines Christlichenn Superattendentten vnnd hirtten gemangelt, So sindt wir vonn dem hochwirdigen hochgebornnen furstenn vnserm freundlichen gelieptten Bruedern herrnn Friderichen, Erweltenn zu hildensheim, erbenn zu Norwegenn, hertzogen zu Schleswigk, holstein etc., freundliche bericht, das S. 1. euch zu einem Superatten(den)tten daselbst widerumb postulirt vnnd vocirt habe, Das ir euch auch daruff Christlich vnd guetwillig habenn vornhnemen lassenn. Nun habenn wir S. l. Christlich neigung vnnd das dieselbe euch erfurdertt, gantz gernne gehördt, vnnd ist vnns der Kirchenn halb erfreulich zuuornhemen gewest, das sie mit euch widerumb versehenn werde, wir lassenn vnns dasselbe auch gnedigst vnnd ganntz wolgefallenn vnnd begernn gnedigst, Jr wollet vff hochgedachts vnsers gelieptenn bruedernn weither schreibenn, zu lob dem Almechtigenn vnnd der Kirchenn Schleswigk zu Trost vnnd guethem, vnbeschwerdt machenn vnnd die vocation annhemen Vnnd darin also forderlich erzeigenn, das Jr mit dem erstenn dem Amptt obzusein vnnd der kirchenn bey-
