262
euer Christlich gebeth sampt denn vnsernn vnnd vnsernn Reichen, landenn vnnd Leuthen beuheln, vnd seindt euch, dem wir dis hinwider nicht wollten verhaltten, mit gnadenn geneigt. Datum. 43. Antwort Doctor Martinn Lutthers Widtwenn gebenn, vnnd werdenn jr funff zehen Rosznobel vberschickt. Actum Drottningburgk den Achtten Februarj Anno 1552ten. Christiann etc. Vnnsern gnedigstenn grues zuuorn. Tugentsame liebe besondere. Wir habenn euer schreibenn, darin Jr vnns vmb hulff zu euerm vnderhaldt ersuecht, gnedigst empfangen vnnd vornhnomen, hörenn euer obligenn dermassen vngernn. Vnnd schickenn euch demnach aus gnedigster Neygung zu steuer euer hauszhaltung bej zeigernn dem Bothenn Scherff funffzehenn Roszennobell, machenn funfftzig thaler, die Jr zn gefallenn anzunhemen vnnd vonn dem Bottenn zu empfangen haben werdett. Vnnd seindt euch mit gnadenn geneigt. Datum. 44. Antwort Philipo Melanthtonn gebenn, Osianders Antwordt etc. vnnd anders betreffen. Actum Drottningburgk zu Randers den 19ten Aprilis Anno etc. lijten. Christiann etc. Vnnsernn gnedigsten grues zuuornn. Wirdiger hochgelerter besonder lieber. Wir haben euer schreibenn bey dem bothenn Scherpff an vns gethonn am tage Annunctiationis Marie datirt sampt denn vbersanten Antwortten vff des osiandrj schriefftenn empfangen Vnnd euer derhalbenn Anzeige vnnd vberschickt zeitungen gnedigst vnnd zugefallenn verstandenn Vnnd thun vns derwegenn gegenn euch mit gnadenn bedancken, das Jr vns solchs vnuerhalttenn sein lassett. Wir wollen dasselb mit gnadenn vmb euch hinwider beschuldenn. Was nhun des osiandrj ergerlich lester schriefft betreffen, Habenn wir gar vngernn gehördt, das Jhme souil Raums gelassenn dise hochwirdige sach Jn druck auszugeben, zuuor vnnd ehe anderer Christlicher theologenn bedenncken darin ersuecht. Was beschwer solch schedlich spaldtungen sonderlich Jn dise vngeuerlichenn zeittenn zuerregenn, habt Jr als ein Christlicher vnnd hochuerstendiger lehrer wol zuermessenn, Vnnd wolle der allmechtige allenn ergerlichen. lehren vnd Sectenn wehrnn vnnd sein Kirch erhalttenn. Es ist auch vonn euch vnnd denn andernn Theologenn Christlich vnnd woll gethann, das solcher Irtumb schriefftlich widerlegt wirt. Wir habenn auch vnser theologenn bedenckenn darine gehörtt, die solche opinion nicht weniger aus gueten schrieffts grunden widerfechtenn. Wir seindt euch auch der zeittung halben gnedigst danckpar vnnd hörenn die vorunruungenn Jhm heiligenn Reich dermassenn vngernn. Der almechtig wolle gnedigenn fridt gebenn Vnnd
