264
wissen. Vnnd schickenn euch zu anzeige vnser gnedigstenn danckbarlichen neigung hiebey einen damaskett zu einem Cleidt, das werdet Jr zu angenemen gefallenn haben vnd annhemen, dan wir euch auch sonstenn mit allen gnaden vnd guethen geneigt. Datum. 47. Antwort philipo Melancton gebenn, denn gemachten friden belangen, vnnd vberschickenn Jhme Kon. Matt. 30 daller zweyen studenten zubeantwortten. Actum Coppenhagen den Sten Septembris Anno etc. lijten. Christian etc. Vnns ist euer schreibenn aus Torgaw denn 14ten Augustj negst datirtt vonn zeigern disem bothenn behandigt wordenn, Vnnd habenn dasselbe samptt denn eingelegten zeittungen zu gnedigstem guethem gefallenn vermergt, Thun vnns auch desselbenn gegenn euch mit gnadenn bedancken. Vnnd habenn denn vertrag vnnd fridz handlunge zwischenn vnsernn liebenn herrn Oheimen vnnd Schwegernn Rom. Keys. Matt. vnnd Churfurst Moritzenn etc. gantz geren gehörtt, Seindt der hoffnung, es werde solcher vertrag zu ehrren dem Almechtigen vnnd gemeiner Teutzschen Nacion wolfartt gereichenn. der herr vnnd vatter vnsers heilandz Jesw Christj wolle fernner gnad gebenn, Das die andern Kriegs sachenn auch zum friden gericht werdenn mugen, Damit weither zerruttung vnnd bluethuergiessen jn der Christenheitt verhuettett werde Als Jr auch vor zwenn vnser vnderthan Johan heyn von Rippen vnnd Christoffer gifft von Nestweden vorbithlich geschriebenn Jren studijs zu steuer zukhommen, So schickenn wir euch hiemit dreissig daller bey diesem bothenn, die wollettt vnder sie deilen, Jedem funfftzehenn. Das sie auch wol studiren, das sehenn wir gerne. woltten euch dises zu gnedigster antwortt hinwider nicht verhalttenn vnnd seint euch, in des Christlich gebeth wir vnns mit denn vnsernn samptt Reichen, landen vnnd leuthenn befheln, mit allenn gnadenn vnd guethen geneigt. Datum. etc. 48. Antwort Ern Johann Flinern Predigernn zu Augspurg gebenn, sein Jtzig gelegennheitt belangen. Actum Coppenhagen denn 13ten Septembris Anno etc. lijten. Christian etc. Wirdiger lieber besonnder. Wir haben euer schreibenn denn 18ten Junij negst zu Augspurg dattirtt euer Jtzig gelegennheitt betreffenn empfangenn Vnnd euer derwegenn enthschuldigung samptt angehenckter dancksage vnser erzeigung gegenn euch gnedigst vernhomen, Vnd haben gantz gernn vnnd mit erfreuen, das Jr widerumb zu euer kirchenn komen seytt. Wir seint des nicht allein woll zufridenn, sondernn sehenn es auch gantz gernn, Wiewol wir, so die gelegenheitt sich mit euch also nicht zugetragenn hett, euch gernn bey vnns gesehenn. Vnnd bithenn denn all-
