272
57. Anndtwordt an doctorn Georg Maiernn, Kon. Mait. gesuntheit zustand und Ehrn Philippi abreisz nach Nurmberg der Osiandrischen secten halbenn etc. belangend. Actum Coppenhagen den 3 Nouembris Anno etc. Lv. Wir Christian der dritt etc. Wirdiger vnd hochgelartter besonder lieber. habenn eur antwort denn viertten octobris negst datirt denn xxvj desselben empfangen, Vnd was jr der proposition halbenn, das wercke zur Selickeit notigk, zu entlicher erclerunge an vns gelangtt, sampt euren erbiethen des Tomos halbenn, Als Jtzo Jm druck sein, Auch was Jr vnsers zustandz, doctoris Pomeranj schwacheit vnnd des hernn Philippo reisz halben nach Nurmbergk meldet etc. allenthalben gnedigst vornommen. Was nhun vnser gesuntheit antreffenn, daruon Jr bericht, ists nicht weniger, der Almechtig gott hat vnns aus besondernn vnd lautern gnadenn von dem schwerenn vnd tottlichen leger, so wir vorgangnes Jars gehapt, gnediglich gefristet vnd erhaltten, das wir Jhme nimmer dafur gnugsam danckenn konnen. Vnd sindt wir allein aus seiner gottlichenn gnad widder aufkommen vnnd sonst durch keinn menschlich mittel, weil die alle ann vns vfgehoret hettenn, Also das wir gott lob vnd danck dergestalt, wie euch verbracht, nu widder gesund vnd woll vormugend seinn. der liebe herr vnnd vater aller barmhertzigkeit wolle vns hinfurter zu seinen ehrenn vnd gemeinem Nutz nach seinem gotlichen willenn durch Christum Ihesum vnsern heiland gnediglich fristen vnnd bewarenn, wie lange es Jhme gefallenn wird, das wir Jhme auch gentzlich heimstellenn. Was aber die Propositionn anlanget haben wir gern vonn euch vormerckt, das Jr die fallenn jassen vnd fernner zu disputirenn nicht gedencket, Dan auch damit, sonderlich vf den grundt, wie Jr meldet sie erregt sey, nichts dann zerruttunge vnd ergernus zuerbawen. Wir haben auch nicht glauben konnen, das eur meinunge die sein solt zuerstreittenn, das die seligkeit denn wercken zu zueignenn, Wiewol solch propositionn Jnn die sechssische kirchen vnd sunst hin vnd widder vast weitleuftig auff genhomen, vnd dargegen schrifte Jnn druck gebenn, das wir nicht gern gesehenn, furnemblich weil diser propositionn halben dartzu vrsach geschepfet. Der almechtig gutig gott, der Jhme von anfang ein kirch gesamblet vnnd also bis vf vnser zeit fur vnd fur erhaltten vnd noch, auch also ans ende diser weltt thun wirdt, der wolle vns alle for ergernis vnd vnreiner lehr behuetten Vnd gnad geben, das wir Jn rechtem Reinen vnd waren verstandt durch vnsern liebenn hernn vnd heiland Jesum Christum vnnd den heiligen geist bis Jns ende beharrenn vnd pleibenn, Amen. Wir habenn auch des hernn doctoris Pomeranj schwacheit Mittleidig vormerckt, vnnd wehr nicht guth, das er der kirchenn jn diser zeit entzogen werden soltt, Doch gehet jnn dem des hernu wille fur, der wirdt auch zu fernner fristung vnnd gesuntheit gnad geben Vnd Jn dem das allgemein Christlich gebet erhorenn, Wie vns dan auch
