273
souil mehr trostet, das Jr meldet, das es nicht ein fehrlich fiber vnnd durch den hern hoffnunge der besserunge ist. Vns ist auch bekummerlich zuhorenn, das der teuffel so vnnleiddig ist vnd auch zu Nurmberg des Osianndrj gifft gesehet hatt, Welcher gefarlichen vnnd gots lesterlichen lehr dem Osiandro gott vorzeihe, so vhor Jhne zu bittenn stehet. vnd ist zubeclagenn, das der teuffel souil Rottenn vnd sectenn Jn so hellem licht der warheit anstifftet vnnd die welt blendett, das dann je zu zeithenn der theologenn eigenn ehrgeitz vnd hoffart, dormit sie vhor andernn Jhre Jngenia auch beweisen mugenn, vorursacht, wie am Osiandro zusehen geweszen, Weil Jeder was seinn wil vnd sich an schlechtern einfaltigenn vorstand der schrifft nicht will genugen lassenn. Wir hoffenn aber doch der Almechtig werde durch denn hernn Philippum als ein getrewen Christlichen arbeitter jnns hern Weingarttenn des orts guts schaffenn, das das bose auszgefegt vnnd vfgereumet werde, solchs bittenn wir von hertzenn etc. Jhr werdet vnns auch, wan die thomos Jm druck auszgehenn, damit vhor vnser betzalunge bedencken, Vnnd wehr der dancksage vhor die vbersannt Rosennobelnn ahne noth, ist vnns allein zugefallen, weill wir vorstehenn, das euch die angenehm seynn. Wolttenn euch dises hinwidder gnedigst nicht vnangezeit lassenn, Sindt euch mit gnadenn vnnd guten geneigtt. Jhr wollet Auch vnns, die vnnsern vnnd vnnser Reiche, lande vnnd leuth Jnn eur vnd der Kirchenn zu Wittemberg Christlich gebet lassenn befolenn seinn. Datum etc. vtsupra. Zettel. Wir begerenn auch gnedigst Jhr wollet vnns, Wann Jr ferner bottschafft ann vns haptt, vorstenndigen, souil euch wissendt, Wie es mit Magister georg Rohrern gelegen, ob der mit des seligenn hernn Lutherj operibus fortfarett, Vnnd ob auch dauon weithers wes jnn druck vorfertigtt wirdt, Vnnd wie es mit Jhme sonst geschaffenn, dan er vnns seider seinem abscheide von hinnen nie nichts zugeschriebenn, wie wir vnns doch wol vorsehenn hettenn. hirann thut Jr vns zu gnedigsten gefallenn. Datum etc. vtsupra. 58. An Johan walter Churfurstlichen Sechsischen alten Cappelln meister. Ko. Mat. verehren Jne mit zehen Engellotten. Actum Coppenhagenn denn 8 Januarij 1556. Christian der dritt etc. Vnnsern gnedigstenn grus zuuorn. Achtbarer lieber besonnder. Wir habenn eur schreibenn sampt denn zweyenn Magnificat auch dem Text vnnd Lied vf vnnsernn Titul gestalt, domit Jr vnns verehret, empfangenn vnnd eur gemutt vnnd wolmeynung gegenn vnns gnedigst vermerckt. Konnen darauf euch gnedigst nicht bergenn, Das vnns solche gesanng zu sonnderlichen angenemen gefallen
