281
euch zuuerstendigen pittet. Nu haben wir woll zuermessen, das die zwey pergamen exemplar sonderlich aufzulegen vil kostens erfordern woltt, wan nicht ein gantz gemein werck zu etzlich thausent exemplarn zudrucken wer, vnnd ist vnnser meinunge gewesen, wan dj Biblia sonst vfgelegt, das zwo derselben von Pergamen vfgelegt werden möchten. Wir haben auch die vbersandten littern der dreyerley artt gesehenn, vnnd gefelt vnns der gröste vnnd grobeste druck, wie auch die vordrigen Biblien, als zu Wittenberg gedruckt sein, nicht vf dem bogen getheilt sondern durchaus gehendt. Wann nuhn derselbig druck vfgelegt wurdt, Begeren wir gnedigst, jr wollet befurdern, das die zwey Pergamenen Biblien mit mugen gedruckt werden, vnnd je ehe es geschehen kondt, je lieber solt es vnns sein, vnnd das schon rein pergamen dartzu gebraucht vnd genohmenn werde. Was die Biblien kosten werdenn, wollenn wir gnedigst vnnd wol bezalenn lassenn vnnd eurem vleis mit gnaden beschuldenn. Das wir euch zu befurderunge der sachenn nicht mugen vnangezeigt lasszen. Sinndt euch mit gnaden vnnd allem guttem geneigt. Datum. 65. An Philippum Melanthonem D. Hardenbergers zwinglische schawermerey vnd jrthumb belangen, daruf er sich mit einem offentlichen schreiben kurtz erclerenn solle etc. Actum Coppenhagen den 18 Junij Anno etc. 57. Christian der dritt etc. Wir habenn zwey eur schreibenn kurtz hindtereinander empfangen vnnd eur meinunge der hochbeschwerlichen jrrunge, als des heilsamen Sacraments des altars des leibs vnnd bluts vnnser heylandts vnnd erlösers Jhesu Christj halbenn zu Brehmen erregt, gnedigst verstanden, Das jr beweget gutt zusein, das gotsfurchtige gelerte Menner sich vntherreden vnnd ein eintrechtige Form fasszen mochten, wie von diser sachenn zuredenn, vnnd das jr erbiettens schirst eur meinunge derwegen jn druck ausgeen zulasszen sampt vernerm jnhalt ju eurem schreiben gemelt etc. Nuhn ermessenn wir wol, das dise vneinigkheitt, als zu Bremen entstanden, hochbeweglich, Wir achten aber, jr hapt dannoch dauon gutten bericht, vnd das doctor hardenbergers schwermerey vf den zwinglischen Jrthumb von dem hochwirdigen Sacrament gestalt. Derwegenn vnnd weil hieuor vonn dem theurenn vnnd seligenn Mann gottes Doctor Martin Luthern vnnd aus der schulen zu wittenberg, auch von andern gelerttenn gotsfurchtigen Mennern des Zwinglij vnnd seiner gesellen schwermerey vhor offentlichen jrthumb widerlegt vnnd verdampt vnnd auch also jnn denn Meissznischen vnd Sechssischen vnnd vnser Kirchenn, gott lob, bis daher vhor verdampt gehalttenn, vnnd durch gottes gnad bey dem Rechtenn brauch vnnd schlechten worttenn Christj plibenn, wie dann kurtz vnnd simpliciter vnnser Kirchen bekandtnus aus der an euch vbersandten taffell zuersehenn gewesen, daruf wir dan nochmals eur bedencken gnedigst
