291
zustellen, die werdet als die vormunden der Kinder Jnen zuuerreichen wissenn. Habenn euch solchs hinwider zu gnedigster anthwort nicht wollen verhalten. Datum. 70. An D. Georg maiorn, zwo Pergamenen Biblien belangen. Actum Coppenhagen den 25 Februarij Anno etc. 58. Christian etc. Wir haben euch vhor etzlicher zeitt der Biblien halbenn schreiben lassenn, dauon Meister Simon Preusz Churfurstlicher Sechssischer hofschneider euch berichtet, die wir vf pergamen gedruckt haben wolttenn, Das jr nur zwo allein vnnd nicht mehr wolttet drucken vnnd jlluminiren lasszen. Nuhn schreibt vnns Hans Lufft Buchdrucker zu Wittenberg, das Meister Simon neulich mit jme von funf Biblien vf Pergamen vhor vnns zudrucken geredt vhor das stuck hundert guldenn. Wiewol nuhn nicht ohne wir habenn erstlich von funf Biblien gesagt, So habenn wir doch letzlich gedachtem hofschneider jungst alhir beuolhenn nur zwo Biblien vor vnns zubestellenn, Wie wir auch an euch geschribenn, Weil jr euch vf M. Simons ansuchenn dartzu willfahrig erbottenn, des wir gnedigst danckbar. Vnnd als wir nicht mehr dan zwo Biblien vf Pergamen gedruckt begerenn, Jst an euch vnnser g. sinnen, jr wollet vnbeschwerdt sein, gedachten Buchdrucker Hansz Lufft solchs zuuermelden vnnd anzuzeigen, Das wir allein zwo Biblien haben wollen, domit er vnnsernt halben keine mehr aufflege. Vnnd wan dieselbe fertig, wollet jr einen jlluminatorem, den besten, den jr der ortt zuerlangen, befurdern, der die Biblien vfs hubscht vnnd artlichst ausstreichen vnd jlluminiren mochte, Vnnd mit jme handeln lassen, was er vhor das stuck begere, vnnd vnns solchs vermelden, So wollen wir dem Buchdrucker vnnd dem jlluminatori das gelt, wie jr mit jnen verhandelt, hinaus schicken. Es hatt Meister Simon den Pfarhern zu Cöln jn Meissen besprochenn, der ein gutter Jlluminator sein solle, der hatt vnns darauf vmb verstreckunge geschriben. Nuhn wissen wir nicht, ob er dartzu gnug geschickt oder nicht. Es sey nuhn der oder ein ander, so wollet jr vleis habenn, das es wol gemacht möcht werdenn, Wann die Biblien fertig sein. Jr wollet vnns auch zuschreiben, wann die Biblien vfgelegt sein, So wollenn wir dem Buchdrucker, der vnns auch vmb verstreckunge zur anlage belangt, das gelt hinaus schicken, vnnd werdet mit M. Simon euch dessenn vergleichenn vnnd jme dis vermeldenn, domit nicht widerwertige bestallunge geschehe. Jr wollet euch hierjnn vnns zu sonderm g. gefallen wilfarig erzeigen, das wollen wir hinwider mit g. vnd guttem vmb euch beschuldenn vnnd erkhennen. Datum. Under 24 Febr. havde Kongen skrevet til Simon Preussz om samme Bibler. Under 28 Febr. skrev han til Bogtrykkeren Hans Lufft om deres Trykning og til Balthasar Kinast, „pfarherr zu Cöln jn Meyssen" om deres Illumination. I B. 4 H. (1855). 37
