294
73. An doctor Gorg Maiorn. werden jme zur notturfft der Biblien zu drucken vnd jlluminiren zulasszen 200 f. muntz vberschickt. Actum Abramsdorf den 19 Maij. Christian der dritt etc. Wir habenn euch jungst der beiden Biblien halben schreiben lasszen, die wir vf Pergament gedruckt begeren, Daruf jr vnns geanthwort, das solchs bey hans Lufften also beschafft, Das jr auch mit Meister Lucas Cranach Malern rede gehabt dieselbenn vfs hubscht vnd reinlichst zu jlluminiren, wie er sich dan desszen gegen euch erbottenn. Vnnd habenn euren gehabten vleis hierjnn zu gnaden vermergt, wollen jne auch hinnwider gnedigst erkhennen. Vnnd gefelt vnns die bestallunge mit dem Buchdrucker gantz wol, Dergleichen auch das Lucas Maler zu der jllumination willig, vnnd wollet demnach befurdern, das die Biblien mit dem ersten als Jmmer muglich mochten vfgelegt, vnnd also wie die Bogen gedruckt, dem maler zugestelt werdenn. Wir schickenn euch auch bey zeigern vnnserm diener Blasio zwey hundert f. muntz, dem Buchdrucker ein hundert vnnd dem Maler je vf die hanndt, die wollet jnen einem jedern sein hundert vnnsern wegen verreichen vnnd desszen Recognition von jhnen nehmen vnnd verwahren. Jr wollet solchs bestellen. Das sinndt wir mit gnaden vnnd gutten zubeschulden geneigt. Datum. Under samme Dato skrives der til Balthasar Kinast, at Illuminationen af Biblerne ikke kunde overdrages ham. 74. An doctor jorg maiorn, die zwo Pergamen Biblien belangen. Actum Randerszen den 12 7bris Ao etc. 58. Christian etc. Wirdiger vnnd hochgelerter besonnder lieber. Wir habenn eur schreiben am Mittwoch nach Marie Magdalene nechst datirt vhor acht tagen vngefehr jn vnnser stadt Alburg sampt den jngelegten briefen empfangen, vnd was Jr der zwo pergamen Biblien halben, so wir zudrucken begert, an vnns gelangt, Auch was der hochgeborn Furst, vnnser geliebter oheim, sohn vnnd gefatter her August hertzog vnnd Churfurst zu Sachsszen derwegenn zubeschaffen geneigt, allenthalben g. verstanden. Wir habenn auch daraus vermergt, das jr die 200 thaler von vnserm diener Blasio bekhommen, vnnd das jr euch zuuerstendigen bittet, wie jr es mit dennselben vnd der Jllumination verhalten sollet etc. Daruf gebenn wir euch hinnwider zuuernehmen, das wir euren vleis jnn dem zu gnedigstem gutten gefallenn habenn, Vnnd dieweil wir aus des Chursechssischen Hofpredigers ern Christian Schutzen schreibenn an euch verstehn, das hochgedachter vnnser geliebter Sohn vnnd gefatter der Churfurst die Biblien selbst drucken, malen vnnd fertigen lassen wil, wie dan ohne zweiffel S. L. euch dauon nuhemer wirdt geschriben habenn, Achtenn wir, das jr es vf S. L. beuhel, wie es domitt
