295
verordnen werden, beruhen lasset. Mittler weil wollet jr die 200 thaler bey euch behalttenn, bis jr zusehenn, wie es S. L. mit den Biblien bestellenn wirdt lasszen. Dauon jr vns verner anzeig zuthun, das wir dann daruff weither vnnser gemutt an euch zugelangen. Wir hettenn gantz gern gesehenn, das der jung Lucas die Biblien jlluminiert hette, vnnd das vnnser Contrafeth von jme vor an wer gemalt worden, So je der Churfurst die Biblien vor sich wurde lassenn drucken vnnd ausstreichenn, Konnet jr von vnnser Contrafactur S. L. oder dem hofprediger vnnser gemutt anzeigen, das wir dieselbe gern vhorn an vf dem erste blade wol gemalt haben wollten, vnnd das die Contrafactur, so je der her Balthasar Kinast jlluminiren solle, gleichwol durch Meister Lucas vf vnnsern Costenn drein gemalt wurde. Jhr wollet solchs vnbeschwerdt sein mit vleis zu bestellenn. Das wollenn wir hinwider mit gnaden vnnd allem guttem vmb euch beschuldenn. Datum. 24 Novbr. s. A. skriver Kongen fra Kolding atter til Georg Maior: „Wir haben euch verruckter zeitt ijc thaler zu behuff der Biblien, euch bewust, zugeschickt, weil aber dasselbig geldt dartzu nicht zugebrauchen erfurdert, Begeren wir gnedigst briefs zeiger vnser diener Johan Gurtlern ije thaler dauon zuzustellenn, die vbrigen funftzig thaler wollen wir euch gnedigst verehrenn." 75. An Johan aurifabrum Hofpredigern zu Weynmarn. werden jme zu verfertigung etzlicher Lutherj seligen schrifften hundert thaler verordnet etc. Actum Coldingen den xij octob. A. 58. Christian etc. Wirdiger lieber besonnder. Wir habenn eur schreibenn den 23 7bris zu Weymar datirt alhir gnedigst empfangen, vnd was jr darjnn von eurem christlichen vorhabenn in D. Lutheri seligen schrifften antzuwenden, von jetzigen Kriegs Rustungen vnnd der spalttung jn vnnser Religion gemeldet, gnedigst verstanden. Wollen euch daruff zu gnedigster Anthwort nicht verhalten, das wir eur vornehmen jnn des genanten seligen Mann gottes schrifften dieselben zusamblen, zuordnen vnnd zu Rectificiren mit gnaden vermergt. Wir schicken euch auch ein hundert thaler, die wir vnnserm Secretarien Caspar Fuchszen euch zuuberschicken zufertigen lassen, die jr von jme zuempfangen. Weil vnns auch gemelter vnser Secretarius eur schreiben auf der post zugeschickt, vnnd die bucher, so jnn eurem schreiben gemelt, so eilig an vnns nicht konnen vortgebracht werden, Seinndt wir derselben noch mit gnaden gewertig, Seindt euch auch darfur danckbar. Wir habenn auch eur anzeige vnd newe zeittung von werender Kriegsrustung zwischen den Potentaten Engellandt vnnd Franckreich zu gnedigstem gefallen vermergt, der liebe gott wolle zu bestendigem friden vnnd einigkheitt sein gnad verleyhenn.
