40
178. 1567, 29 Sept. Vnser freundtlich grus vnd alle muterliche trew zuuor. Durchleuchtiger furst, freundtlicher lieber sohnn. Wir haben e. l. widerschreibenn, bey vnserm ambtman Martin Schwentzin gethan, zu vnsern handen empfangenn vnd vernommen. So ist vns das andre e. 1. schreiben bey derselben laggeyen auch zuhanden kommen vnd bey jm widerumb beandtwort worden, dahin wir vns hie mit geliebter kurtze halben wollen gezogen, aber gantz muterlich gebetten haben, das e. l. vns wolle die pfandguter, so zum closter zu Odensee gehören, vor die achtzehenhundert daler hinfurter gebrauchen lassen vnd hierauff jrem ambtman Gadendorff befelhen, sich derselben wie nit weniger der andern bauren, so vns e. l. widerumb eingereümbt, zuentschlagen. Das wirt vnser her Got e. l. hundertfeltig belohnenn, was sie jrer muter zu ehren vnd gutem erzeiget. Das aber e. 1. bruder hertzog Hans ietzo verschreibung von sich geben solt, sich der guter, so zum reich gehoren sollen, zuentschlagen, jst ja vnsers erachtens vergeblich, dan wer vnder ewer beder liebden vnsern thod erlebt, der helt sich nach den theilbriefenn, vnd ist andrer verschreibung ye nit notigk. Biten demnach auch, e. 1. wolle es dabey beruhen lassen vnd der geliebte sohn vnd pruder pleiben. Von vns sol e. 1. jm werck nichs anders befinden alls allein dasihenig, was einer getrewen muter geburt. So versehen wir vns, e. 1. bruder herzog Hans thue derselben auch nichs zw wider, vnnd bitten schlieslich abermals vleisig vns die bauren vor die achzehen hundert taler zulassen vnd vor andern zugonnen, oder, da es nit geschehen will, zu gestatten, das wir vnsere vfborungen vnd was vns von anderen jahren nachstedt zuerlangen. Das wir aus dem stifft Schleszwigk einen probst gefordert haben solten, geschicht vns auch vnrecht, dan vnser gesetzter probst jst jn Sundewith bej Sonderburgk ein pastor, gelert vnd eines guten wandels, dagegen der alte probst ein lehe, der gern von solichem schwaren ambt wolt. Das wusten wir e. 1. zu bericht hiemit auch nit zuuerhalten, vnd verhoffen, das wir vns mit e. l. bischoff wol vertragen werden, so sehr er es Christlich vnd wol meintt zwischen muter vnd sohn. Befelhen hiemit e. 1. Gotts schutz. Datum Winsen 29 Sept. anno 67. Dorothea. Dorothea von Gots gnaden, konigin zu Dennemarken etc., geborn zu Saxssen, widtwe. Original paa Papir med Udskrift til Kongen og Spor af Segl i rödt Vox.
