76
dem werk seinen angesetzten gang lassen müssen, vnangesehen es vns hoch zuwider, das wir e. 1. missen sollen. Vnd wird der allmechtige Gott gleichwohl hernahmals die ehste gelegenheit vnzweiuelich verleichen, das wir vns vnder einander mit freuden zuersprechen vnd zuergötzen. Wir mögen e. l. auch freundlich nit bergen, das herzog Julius zw Braunschweig schreibt, wie geflissen s. 1. wol wer derselben zusag zuhalten vnd jnn der person zuerscheinen, wa s. 1. wegen des einrits zw Braunschweig, dauon j. 1. vbermässig trinkens halb jnn krankheit gefallen, auch anderer erzelten ehafft, darinn wir seine 1. gantz wol entschuldigt wissen, nit verhindert wurden, jre 1. wolten sich aber gleichwohl zum getreulichsten angelegen sein lassen wo müglich nit auszubleiben. So schreibt herzog Philips zw Braunschweig gemahl zw, wa fehre sie schwacheit halben nit verhindert, also das wir noch jm zweiuel steen. Weil aber gleich wohl die böse vnd kurtze wetter tage herzunahen, auch der weg weit, achten wir dauor, es werde wohl also verpleiben; des wir dann ganntz wohl zufriden, weil wir e. 1. nit haben können, fragen wir nach den andern auch nichts. Vnd wuntschen von dem allmechtigen lieben Gott, den wir auch zum diemütigsten darumb bitten, sein Götliche allmacht wolle e. 1. zw jrigem jezigem vorhaben glück, heil vnd solche wohlfart verleihen, das sie aus disem sorglichem krieg gerathen vnd jren vnderthonen Gotseliglich beiwohnen möge, dann wir haben mit schmerzen verstannden, das der Schwede jnn Schona mit brennen vnd plundern so vbel haushelt. Wir haben e. 1. jungst zw Fridrichsburg vnser weiblichen einfalt nach treulich geraten nit vor Warberg zuziehen, weil e. 1. solchs haus nit entlauffen köndte. Aber wie wir versteen jst es Gottes vnwandelbarer will gewesen. Demselben getrewen Gott wir e. l. herzlich befelhen. Datum Coldingen den 9ten Nouembris anno etc. 69. Dorothea. Dorothea von Gots gnaden zw Dennemarken, Norwegen, der Wenden vnd Gothen kunigin, geborne zw Sachsen etc., herzogin zw Sleswig, Holstein etc., grauin zw Altenburg vnd Delmenhorst, witwe. Original paa Papir med Udskrift til Kongen og Segl (det Danske og det Saxiske Vaaben) i rödt Vox. Paa to indlagte Sedler: Auch freundtlicher geliebter sonn. Wir bitten gantz freundtlich, e. 1. wolle geburliche mitel nit verachten vnd derhalbenn doctor Martin von Coppenhagenn verbottschafften vnnd vff e. 1. wartenn lasseun, dan in disem wasserhafftigen bösen wetter sich bald ein kranckheit, die der allmechtige Got gnediglich verhutten wolle, ereugen kan. Datum vt in literis. Dorothea.
