122
machen, des e. k. mt. do von stundt zcuthun gantz gneigtt gewest, doch der zceit mit sulchen kriges geschefftenn behindert, das e. mt. do zcumal nicht hette dor zcu komen mogen, so es aber ko. mt. nach gelibet vnd vns wege, form vnd masz, wie dar zcu zcukomen wer, angezcigk wurden, angesehen das e. k. mt. vrsach des kriges nicht wuste, dor vmb auch bequeme mittel vnd vorslege schwerlich finden konde, alsz denn wolde e. k. mt. ausz sich vnd vnuormergket von fride ader bestande zewischen beyden maiestaten von Engellandt vnd Franckreich zcu handeln dorch vns den konig von Engellandt anreden lassen; befunde denn e. k. mt. den willen von beyden seyten, denn wolde e. k. mt. dor an muhe vnd arbeit auch leib vnd gueth nicht sparen; hette es auch bey ko. mt. anderungh gewonnen, wer e. k. mt. beuel beym konige von Engellandt douon nichts zcu melden, welchs e. k. mt. in seiner mt. bedencken stellette etc. Dor zcu weren wir auch willens vff e. ko. mt. beuel in Schotlandt zcureiszen, hette ko. mt. do wes zcu schaffen, das man vns beuelen, wolden wir gernn an vns nemen vnd vnszers vorstandes auszrichten, welchs alles e. ko. mt. fruntlicher wolmeinungh s. k. mt. anzeigen laszen etc. Nu wer auch ko. mt. von Franckreich e. k. mt. vom zeweyen vnd drey vnd zewenzcigisten jaren zcweie penszion schuldig, die man vff vorgehent furdernn eygentlich vff dissen termyn zcubezcalen vorsprochenn, dem nach betten wir, das vns dieselben pension vff gewonlich quietantz mochten entricht vnnd behandett werden, e. k. mt. bestes vnszerm beuel nach domitte zcubestellen. Vnd die weil auch e. k. mt. mit Gotlicher hulffe nu auch zcu koniglichen wirden komen vnnd einen son hette, der ein junger loblicher furste were, welcher sich auch redellicher kriges hendel vnd anderer furstlicher tugent zcu erfaren vnd zcu vben gantz vleissig anneme, vnd domit derselb in steter vorwantnis der kronen von Franckreich aufwachsen, der auch, wenn e. k. mt. nicht lenger were, das Got lange vorpithe, furder trewlich vnd vleissig dinen mochte, so hette e. k. mt. dieselben pension demselben e. k. mt. szone h. vberlassen vnd geben jn vortrawen, ko. mt. szolde des auch vmb e. k. mt. willen zcu friden sein etc. Mit bith, das man vns vff sulch vnszer anbringen mit gnediger vnd sleuniger antwort widervmb abfertigen wolde, das wolden wir etc. Vff disz vnszer anbringen hat der konig von Franckreich mit dem cantzler, dem grandtmeister vnd dem von Gisze ein gesprech genomen vnd vns dor nach an alle disputacion ader vnderrede dise antwort durch den cantzler geben lassen: Zcum ersten nem ko. mt. die fruntliche erbithungh zcu hohem danck an vnd erbothe sich nicht weniger wider vmb gegen e. k. mt., sonder derselbenn jn gleichem vil grosserem allewege etc. Vors andere were ko. mt. der angezeigtten victorien hochlich erfrewt vnd zcuuor, do es s. k. mt. am ersten erfaren, nicht weniger erfrewet gewest, denn ab sulchs s. k. mt. selbst begegenet vnd widerfaren were. Das wir auch in Engellandt gefertiget, lisz ko. mt. do bey, das wir do hin reiszetten vnd vnszer notturfft handelten; das aber jmandes szolde v. g.
