123
beuel gehabt habenn e. k. mt. zcufurdern sich zcwischen Franckreich vnd Engellandt in handellungh zcu slahen, wurde sich jn warheit nicht befinden, mochte sich villeicht sunst vnnderreden geschickt haben, dor ausz sulchs vorstanden sein mochte. Von konige von Schotlandt weren secretarien itzundes am hoffe vorhandem, das vns mit etwas dohin zeu besweren nicht von nothenn. Aber die penszion belangende wer man wol gestendig, das die auff diszmal zcubezcalen zcugesagtt, sonder ko. mt. were mit szo grossen schwerwichtigen sachen vnd handeln an vilen orten der werlt beladen, das s. ko. mt. vff diszmal zcur bezcalungh in keinen wegk komen konde ader mochte, zcu seiner zceit szolde die wol entricht vnd bezcalt werden, mit beger, das wir vff diszmal von wegen e. k. mt. diser antwort wolden gesetiget sein. Dor vff wir replicirt vnd gesagtt, das e. k. mt. nu zcum andern mal nach der pension geschicket vnd der vast den halbenn teyl vorzceren lassen, solde sie e. k. mt. nu auch nicht werden entricht, were beswerlich, wenn sulch kleine sume konde ko. mt. zcu iren grossen hendeln wenig steuren. Vff disse Lateinische rede vnnd widerrede hab ich Diderich von Reith mich mit dem konige in Wellisch zcu redenn begeben, der mir vnder andern gesagt, es sei billich, das man die penszion bezcale, er hab sie e. k. mt. versprochen vnd zcugesagtt, dorvmb szolle sie entricht werden. Auch hab ich do zcu Wellisch den konig vmb paszbriue wider zcu rucke vor vns vnd vnser diner gebethen, die er erlawbet vnd dem cantzler zcugeben beuolen. Als wir nu nach vnszern abschide vom konige vnder vns von disser zeweyspeltigen antwort des koniges vnd des cantzlersz zcu reden wurden, bin ich Mathias Brandt des andern dages zum cantzler gangen, yn vmb vnszer abfertigungh angesprochen. Hat her mir gesagt, was abfertigungh ich nu mehr haben wolle. Hab ich jme geantwort, e. k. mt. pension von zcweyen jaren vnd die briue, die vns ko. mt. vorschafft hette. Do hat er gesagtt, die briue wolle er des dages fertigen lassen, der pension halben hette ich die meynungh von jm wol vornomen. Dor vff hab ich jm gesagt: meyn geselle sagtt mir, der konig hab jm jn Wellisch die pension nu zcubezcalen zcugesagtt. Dor vff der cantzler: ich meyn ich hab den konig als wol vorstanden als ewr geselle. Hir auff bin ich Ditterich von Reith auch zcum cantzler gangen vnd jm gesagtt, was mir der konig der pension halben jn Wellisch geantwort. Hat sich der cantzler mergken vnd horen lassen, das die pension e. k. mt. nirgen anders vmb geben sey den von wegen des hertzogen von Suffolks; nu szolde wir in Engellandt reiszen, was konden sie wissen, was wir do handeln wolden. Dor ausz ich vormercket, das sie vnser handellungh nach Engellandt arwenick hilden, dorvmb ich do dem cantzler jn Wellisch den gantzen grundt aller handellungh jn Engellandt, vnd das allein dem konige von Franckreich zcum besten sey, berichtet, jm auch angezeigt, wenn e. k. mt. wes szonderlichs mit Engellandt handeln wolde, das sie das gar vil neher, wenn durch Franckreich bekomen konde, mit bith, das der antwort, die von
