199
nam paternitas uestra putabit opus fore mihi nouissimis instructionibus meis ad hoc, ut probem dominis præsidentibus me mandatum habere a rege meo una cum altero collega meo ad recipiendas et exportandas pecunias, rogo ut eas hoc nunctio ad me mittat paternitas uestra, ne sit ulla reliqua occasio ad proferendum me longius, si intellexero id agi, ego per equos dispositos recta Christianissimum regem uestram et una paternitatem adibo. Quicquid feci pro rege meo, hoc certus sum me consilijs et auxilijs paternitatis uestræ fecisse; inde adeo non dubia spes obsedit me, quod paternitas uestra in extremo hoc actu non deseret me, cum antea fauerit semper, adiuuerit et promouerit. Nec est quod uerba uelim pro maximo benefitio reddere. Hoc sibi persuadeat de rege meo paternitas uestra, quod non sinet ullas occasiones præterire, per quas possit ostendere se paternitati uestræ ex animo amicum esse; me uero nulla dies eximet a seruitio paternitatis uestræ, neque si Nestore sim futurus uiuacior. Hijs paucis paternitati uestræ bonam ualetudinem et longam uitam imprecor eamque Deo optimo maximo commendo. E charta primæ scriptionis Petri Suauenii. 58 b. Litteræ Petri Suauenii ad Jo. Bellaium episcopum Baionensem scripta. 1532, 15-26 Julii. Hæc iam quarta est hebdomada, reuerendissime pater, ab eo tempore, quo reuersus ab aula Lutetiam Parrhisiorum sum ingressus. Anxie expecto rescriptum a Christianissimo rege ad præfectos ærarij, et eo quidem magis, quod uidentur me, nescio equidem quousque aut quamdiu, protrahere uelle. Postridie a discessu domini Lange, qui frater est paternitatis uestræ, conueni thesaurarios in arce, ubi aliquot confluxerant, tractaturi, ut apparebat, de regijs negotijs. Nihil aliud ab illis impetrare potui, nisi quod dixerant prius, expectandum esse mihi usque ad decimumquintum diem Augusti. Nostræ interim res sic se habent domj, ut ista mora non possit sine maximo damno nostro abire. Referunt equisones, qui ad Iacobi ferias aliquo numero huc confluxerunt ex Dania, Christiernum a nostris hominibus terra marique sic infestarj, quod non dubitant promittere nobis ex incerto bello certam uictoriam, si modo susceptam oppugnationem prosequamur. Loci situs pro uallo, muro fossaque est aduersarijs; habent illi obnoxios aliquot episcopos, commeatum cæteraque uitæ necessaria ab inferioribus Germanis accipiunt. Nimirum nunc maxime esset opus nobis præsenti auxilio Christianissimi regis, ut nostros in offitio continere et hostibus infensi porro adesse possimus. Hollandi cum plenaria potestate miserunt ex suis aliquos ad comitia Hafniana, adsunt hic quibus in itinere uenerunt obuij; quid poterit agi aut tractari cum illis ante meum aduentum? Equidem nouissimas literas Christianissimi regis per spectatæ fidei hominem meum curauj ad regem meum deferrj; nunctiaui 25*
