256
ostendere uolui magnificentiæ uestræ, me non uidere, quamobrem tanto principis mei dispendio, meæ uero etiam existimationis aliquo periculo, hic debeam otiosus detineri. Si dominatio uestra morbo occupata mihi dare operam non potest, at certe ut conscia regiorum consiliorum literas secretarijs confitiendas demandare potest et me aut illustrissimo domino duci de Norfock aut cuicumque tandem ex consiliarijs commendare, cuius opera ad serenissimum regem deducar et responsum, quod dandum est, accipiam. Hac de re quid uideatur, rogo, ut magnificentia uestra renunctiare uelit. Ego cum aliud non possim in præsentia, dominationj uestræ meliorem ualetudinem imprecor, cui etiam me quam possum offitiose commendo. E charta primæ scriptionis autographa. 73. Litteræ Petri Suauenii ad doctorem Bedellum scripta. 1535, 5 Aprilis. Quod heri paucis uerbis egi Egregie domine doctor, patrone obseruande. præsens apud dominationem uestram, hoc in præsentia repetere cogor per literas, ne dominatio uestra, ut quæ grauioribus negotijs intenta est, petitionis meæ et promissi sui obliuiscatur. Veni huc ante sex hebdomadas iam elapsas a principe Holsatiæ Christiano missus ad regem serenissimum, ea negotia attuli, quæ nihil minus quam longas moras admittunt. In præsentia cum et male habeat magnificus uir dominus Crumwellus, a quo expeditionem meam petere iussus sum, et non facile quemquam se patiatur accedere, equidem ut grauissima necessitate circumuentus ad dominationem uestram confugio ut ad amicum intimum domini Crumwelli eamque rogo, dominatio uestra pro me uelit admonere dominum Crumwellum, ut me, sicut iam sæpe pollicitus est, quamprimum expediat. Si id fieri non potest, tum id quod proximum est peto: velit saltem dominus Crumwellus mihi saluum conductum concedere pro uno ex famulis meis, quem ego destinaui mittere ad principem meum, ut significet, quod mihi hic necessario adhuc aliquamdiu manendum sit. Poterit, ubi hoc intellexerit princeps meus, undequaque rebus suis melius et rectius prospicere, ego fidelis ministrj partes præstitero. Certe si unquam ulla in re uicissim queam inseruire dominationi uestræ, facerem id tam libens, quam qui id facere possit libentissimus. Quam Deo optimo maximo incolumem commendo. E charta primæ scriptionis autographa, cui a tergo inscriptum est: „exemplaria supplicationum, quas accelerandi negotij caussa in Anglia regi, Crumwello et alijs præsentauj", et in qua Suauenius etiam exarauit eam, quæ sequitur, Latinam versionem cedulæ appositæ litteris ad Christianum III scriptis, qua sine dubio demonstrare voluit, Jacobum Rönnov quoque, etsi litteras consiliariorum ad Henricum VIII datas (nr. 66) non signauerit, nunc a partibus Christiani III stare: Præterea, clementissime domine, notum esse uestræ celsitudini humiliter uolo, quod heri uesperi, quando episcopus Sialandicus uenit huc ad me, erat forte fortuna apud me Conradus de Hanstein, supremus
