95
serenissimo principi domino Christiano eadem gratia Daciæ, Norwegiæ, Slauorum Gotthorumque regi, duci Holsatiæ, in Holdenburgh et Delmenhorst etc., fratri et amico nostro carissimo, salutem. Quum superioribus annis, rebus tunc Daciæ tumultuantibus, intelligeremus nonnullas merces et bona dilecti ac fidelis subditi et seruientis nostri ad arma Willielmj Sabinj, ad summam, ut accepimus, ducentarum librarum nostratium ascendentia, per subditos vestros falso cuiusdam Scoti istic existentis prætextu detenta iniusteque sequestrata fuisse, scripsimus tunc de ea re ad istius vestri regni gubernatores ac binis nostris litteris hanc causam illis ex iustitia decernendam impense commendauimus, fore sperantes, ut dictus noster subditus nostro iustitiæque intuitu ius suum de præfatis bonis recuperandis omnino consequeretur. Super qua causa reuerendus dominus episcopus Roschildensis, magnus regni Daniæ tunc cancellarius, benigne nobis respondit suisque litteris pollicitus est, bona fide se curaturum effecturumque, ut dictarum mercium et bonorum, quorum uenditionis, ne interim corrumperentur, onus in se susceperat, restitutio siue iusta compensatio eidem Willielmo Sabini aut eius certo procuratori et deputato fieret, quando discussa causa cognouerat ex rei ueritate, dicta bona et merces ad ipsum pleno iure pertinere. Quare quum serenitatem vestram pro suo officio et quod gerit erga iustitiam studio pro comperto habeamus erga omnes iustas æquasque causas propensam esse, uoluimus his nostris litteris præfatum nostrum subditum ipsi commendare, qui quum impræsentia pro dictis suis bonis recuperandis hunc suum procuratorem et deputatum, præsentium latorem, sufficienti authoritate suffultum istuc mittat, eandem serenitatem vestram obnixe rogamus, ut eum benigne audire et in tam iusta causa uelit illi pro suo iure assequendo adsistere et, quoad æquitas iustitiaque patitur, ita fauere, ut absque longiori dilatione præfatus subditus noster bona sua recuperare et damni accepti honestam aliquam compensationem, ut æquum est, consequi possit. Quod et iustitia consonum et nobis gratissimum erit, qui data occasione erga eiusdem serenitatis vestræ subditos in re consimili beneuolentiam nostram et erga iustitiam propensionem semper comprobaturi sumus. Et felicissime valeat eadem serenitas vestra. Ex regia nostra prope Londinum die xij Aprilis m. d. xxxviij. Vester bonus amicus et frater Henry R. Petrus Vannes. Ex archetypo chartaceo, cui a tergo adsunt sigillum cera rubra impressum, præscriptio ad Christianum regem et inscriptio: Engellandt vhorschrifft vhor Wilhelm Sabinum etzlich abgenommen guether belangen.
