96
b. Pro Adamo Sampson et Roberto Legge 1. 1538, 2 Maii. Henricus octauus Dei gratia rex Angliæ et Franciæ, fidei defensor ac dominus Hiberniæ et in terris ecclesiæ Anglicanæ immediate sub Christo supremum caput, serenissimo principi domino Christiano eadem gratia Daciæ, Norwegiæ, Slauorum Gotthorumque regi, duci Holsatiæ, in Holdenburgh et Delmenhorst etc., fratri et amico nostro carissimo, salutem. Alijs nostris litteris, quam ex animo potuimus, causam quandam fidelium ac dilectorum subditorum nostrorum Adami Sampson et Roberti Legge vestræ serenitati commendauimus, eam impense rogantes, curare uellet, ut pro eorum naui, cui Anna nomen est, eiusque armamentis ac bonis detentis ius suum illis tribueretur, iustaque et æqua fieret compensatio, quas nostras commendatitias litteras multa nostra cum uoluptate intelleximus ab eadem serenitate vestra beneuolo et amico animo acceptas perlectasque fuisse, dictamque nauim utcunque ... lis multa ex parte illisam et attritam ipsis esse restitutam, nauticis quidem armamentis alijsque rebus necessarijs nudatam atque spoliatam, nihil præterea eisdem numeratum esse pro nauis prædictæ atque armamentorum, ut moris est, conductione et detentione, quam summam dicti nostri subditi rationibus non obscuris probant ad trecentas et quinquaginta duas libras nostrates ascendere. Hæc summa quum grandior sit, quam dicti nostri subditi, quorum indemnitati, quoad iustitia patitur, libenter prospicimus, absque grauissimo rerum suarum detrimento et interitu sustinere queant, voluimus hanc eorum causam eidem serenitati vestræ, quam scimus iustitiæ cultricem et nobis gratificandi studiosam esse, iterum atque iterum commendare. Eam igitur magnopere rogamus, ut postquam dictorum subditorum nostrorum petitiones rationesque ad rectitudinem ac ueritatem probe excusserit, uelit illis ex æquo et iusto detenta bona et perpessa damna compensare; id quod etsi pro optimi principis officio ultro ab eadem serenitate vestra factum iri nec illi nec nos ambigamus, ob mutuæ tamen nostræ amicitiæ respectum tum in hac tum in cæteris quibusque iustis æquisque causis nostrarum litterarum interuentu propensam ipsam semper, liberalem ac facilem futuram confidimus. Cui non alio animo subditorum nostrorum causas commendamus, quam ut in re consimili in iureque suo cuique ministrando beneuolentiæ parilitatem data occasione semper comprobemus. Et felicissime valeat eadem serenitas vestra. Ex regia nostra Grenwici die ij Maij m. d. xxxviij. Vester bonus amicus et frater Henry R. Petrus Vannes. Ex archetypo chartaceo, cui a tergo adsunt sigillum cera rubra impressum et præscriptio ad Christianum regem. 1 Cfr. supra nr. 98 et 99 (pagg. 50-52).
