110
122. To Skrivelser fra Jean Lebreton og Montmorency til Præsident Bertrandy om de evangeliske Fyrsters Gesandter. a. 1538, 14 Juni. Monseigneur. Jay parcydeuant receu vne lettre de vous, escripte a Lyon, et veu vne que escripuiez au roy du mesme jour, par laquelle luy faisiez entendre larriuee de vous et des ambassadeurs dAllemaigne audict lieu, a ce quil luy pleust vous mander ce que vous auriez a faire et la ou vous deuriez mener iceulx ambassadeurs pour selon cela vous conduyre et gouuerner. Et depuys jay receu deux autres de voz lettres des xjme et xijme de ce moys, faisans mencion de vostre arriuee en Auignon; et veoyant par le contenu dicelles, que vous nauez point receu la depesche que le roy vous a faicte pour responce de vostredicte lettre de Lyon, je vous veulx bien aduertyr, que le jour mesmes ou le lendemain que nous les eusmes receues le roy vous escripuit, quil estoit tresaise de larriuee de vous et diceulx ambassadeurs audict Lyon, et que vous eussiez a vous en venir et les amener audict Auignon pour la attendre larriuee dudict seigneur ou autres nouuelles de luy affin de vous conduyre selon cela. Et fust enuoye le paquet dudict sz audict Lyon par la poste et adresse a Pierre de Bourgoigne, auquel jescripuiz le vous bailler jncontinant. Et la principalle cause pour laquelle je pense que vous ne layez point eu, cest a mon aduis pour ce que vous estes party dudict Lyon auant quil y fust arryue; je ne scay si depuys vous laurez receu ou non. Jl se pourroyt bien faire aussi, que vous vous seriez mys par eaue pour venir audict Auignon, qui seroit encores une autre occasion suffizante de ce que nauriez receu ledict pacquet. Touteffoys en toutes facons jl me semble, que le mieulx que vous puissiez faire, ce sera suyuant ladicte depesche de ne bouger de la, si le roy ou monsz le connestable ne vous escripuent faire le contraire. Quj est tout ce que je vous puys dire pour ceste heure, sinon que je vous veulx bien aduertir quil ny a encores rens conclud ne arreste en laffaire pour lequel nous sommes icy, mays dedans vng jour ou deux je pense que nous verrons la fin et yssue de ce negoce. Me recommandant treshumblement a vostre bonne grace et priant Dieu, monseigneur, vous donner tresbonne et longue vye. Escript a Villeneufue le xiiije jour de juing mil vc xxxviij. Vostre treshumble seruiteur I. Breton. Udskrift: A monseigneur monsz³ le premier president de Thoulouze. Egenhændig Original paa Papir med Segl i rödt Vox.
