120
nach dem ersten schreiben geschrieben, das wyr zw Auignon jrer mat. warten solten, das selbe hielt er auch gut sein, aber solche schryfth des kunigs war dem presidenten nicht zukhommen; dar aus er vnns hat bereden wollen, das wyr widerumb gegen Auignon keren solten. Vnd nach dem wyr des selben aus allerlej vrsachen, die weil wyr albereit do dannen verruckt, bedencken gehabt vnd vns zw yhm jn sein herberge begeben wollen, do isth vnns auff der gassen einer graff Wylhelm von Furstenbergs diener begegneth vnd vnns von s. g. schryfte zugestellet, dar aus wyr befunden, das jm die koe mat. von vnser ankunfth berichtet, jhm auch bevholen vnns zuschreiben, das wyr vnns nichts anders versehen solten; dan das jre mat. alle dem ienigen, wes s. mat. vnsern gnedigsten vnd gnedigen herrn zugeschrieben, nachkommen wolten, vnd do es von noten, das wyr auff Marsilien ziehen wolten aldo jrer mat. ankunfth zuerwarten, welchs wyr also dem presidenten vermeldet vnd jm nachmals angetzeigt, die weil wyr albereit von Auignon verruckt, das wyr auff Marsilien auff solch schreiben graff Wylhelms ziehen wolten. Vnd wie woll wyr befunden, das er das selb villeicht mher jn ansehung der grossen hytze dieser lantart vnd anderer vnbeqwemlikeiten halb dan etwes anders halben gethan, so hat er doch dasselb letzlich zw vnserm wyllen gestalt, vnnd wyr seint also fort nach Marsilien gezogen. Aber desselben tages hat graff Wylhelm von Furstenbergk doctor Hansen von Metz zw vnns auch mith einer credentz vnnd werbung geschickt, durch wylchen er vnns etzlicher massen der handlung zw Nysse bericht thun auch weiter getrosten lassen, wie die koe mat. yn allwege jres erbietens jngedenck sein wolte, vnd das die koe mat. den herrn von La Fossa der wegen abgefertiget solchs vnsere gnedigsten vnd gnedigen herrn von der kon mat. wegen zugetrosten; vnd hat vnns bemelter doctor ferner angetzeiget, das jm der conestable bevholen, das wyr vnns gegen Marsilien begeben wolten. Dar auff wyr nun also gen Marsilien gezogen vnd haben alda jn den neunden tag, ehr dan die koe mat. ankhommen, warten mussen, dan die koe mat. hat yn viel tagen zuschiffen keinen wyndt gehabt vnd doch letzlich zw schyffe ausgetretten vnd zw lande gezogen. Ehe aber yre mat. ankhommen, hat vns graff Wylhelm verstendiget, das er etlicher schwacheit halben auff Marsilien nicht zukhommen kunte, vnd das er auff den tag zw Asses ankhommen wurde; wo wyr nun etwes bej jme zuschaffen, so hetten wyr jnen alda anzutreffen. Als haben wyr nicht vnderlassen, einen vnter vnns zw seiner gnaden abgefertiget, da mith wyr grundtlich verstendiget werden mochten, wie sich die handlungen zw Nysse verlauffen. Dem selben hat s. g. noch den bericht gegeben, das allerseits vnser gnedigsten vnnd gnedigen herrn jn dem auffgerichteden anstande myth begryffen; vnnd befunde die koe mat. jn allen sachen nochmals rechtschaffen; er hette auch keinen zweiffel darann, vnsere sachen wurden sich zum besten schicken, dan sein gnedigster kunig hette gelts genug, wurdt es dar an nicht mangelen lassen. Wyr haben auch sein bedencken
