122
Was nhun anlanget die ersten drej artikell, der ysth er myth vns einig vnd zufrieden gewesth, vnd sonderlich des conciliums halben, aber den letzten, die erlegung des gelts belangende, den hat er vor sere vngleichmessig angezogen vnd gesagt, er wuste, der selbe artikel wurde dem kunig vnd conestabel nicht gefallen, dan der kunig begert die gleicheit zuhalten. Dar auff wyr allerlej persuasiones furgewandt vnd sonderlich, das etwen diese wege von dem herren Langeo vnsern gnedigsten vnnd gnedigen herrn von ko mat. wegen selbsth furgeschlagen, vnd gebeten solchs den herrn conestabel zuberichten; wilche aber bej jm wenig ansehens gehabt, doch sich erbotten, ehe dan ko mat. zw Marsilien auffbreche, wie dan des selbigen tages geschehen, dem conestabel solchs zuberichten. Vns ysth aber des orts auff die selben mittel kein ander bescheidt angetzeigt, dan koe mat. wolte sich zw Marsilien erheben vnd von dannen sich gen Tarrascon yn Langedocken begeben; alda weren jre mat. bedacht dieser sachen halben etzliche tage stille zu liggen vnd myth vnns weiter handelen lassen, dohin solten wyr s. mat. volgen. Als seint wyr gleich auff einem tag myth jrer mat. zw Tarrascon ein kummen, aber gleichwoll vasth gegen dem abent, dan wyr vns bej graff Wylhelmen von Furstenberg von wegen der handlungen, die vns zum teile sonderlich auch yn diser gemeinen sachen an s. g. zutragen beuolhen, verweilet. Vnd domals haben wyr wol gedachtem graffen dieselben mittel, wie wyr die furgeschlagen, angetzeiget; die jm sein g. hat gefallen lassen, auch angetzeiget, das jm der conestabel geschrieben, das das ende dieser handlungen besser sein solte dan der anfang, vnnd wyr solten vnsern herren gute botschafth brengen, er gedechte auch vns nicht abtzufertigen, graff Wylhelm were dan dar bej; hett ym auch also angetzeiget, das der kunig vff ein schloss drej meil vngeferlich von Tarrascon verrucken wolle, al da hin solt graff Wylhelm der halben zw jrer mat. khommen. Vnd hat weiter angetzeiget, das der conestabel von jme diser sachen halben guten bericht hab, zw dem so verstunde es die koe mat., die mhermals auch myth jme dar von geredt, der gleichen so verstunde der cantzler vnnd andere den handel sere wol; vnd hath also vast vor gewyss sagen wollen, dieser handel werde nach alle vnserem wyllen vnd gefallen furgengig sein. Als wyr nun, wie obgetzeiget, zw Tarrascon ankhommen vnd wyr jensyt des Rodans gelosyrt vnd am wasser bys zur fehr hin auff gezogen, haben wyr die koe mat. am wasser funden, welche nach essens dohin spatzieren gangen. Als nun s. mat. vnd hoffgesinde vns gesehen, isth einer myth namen Georg Lucke, ein Denmarcker, seiner mat. hoffgesinde, zw vns gangen vnd gesagt, er wolt vns vor newe zeitung antzeigen, das die koe mat. des andern tages gegen Eckmort, acht meil wegs von Tarrascon gelegen, ziehen wolte; alda wurde die kaye vnd seine mat. zusammen khommen vnd einander ansprechen. Do wyr nun solchs vermerckt vnd von solcher eilender zusammenkunfth kein mensch kein wort gewusth, haben wyr desselben vber
