128
sege, das wyr einen vnter vns hetten, der mith schwacheit beladen, den wir vber das gebirge so weit nicht gernne fhuren wolten. Aber summa summarum er isth auff seiner meinung beharret, vnnd haben gegen Mulin ziehen mussen. Do wyr nun zw Mulin ankhommen, haben wyr den kunig alda nicht funden, sondern er isth vff drej meil wegs von Mulin zw Schauene auff einem iachthause gelegen vnd wedewerck getrieben. Haben wyr myth dem presidenten, der dan zw Mulin jn der stadt gewesth, weiters nicht handelen wollen, sondern drej aus vnserem mittel gen Schauena abgefertiget, welche den conestable selbsth ansprechen solten. Welchs also geschehen. Do dan dem conestabel der selbe bescheidt, so vns vom presidenten beiegenet, fur beschwerlich angetzeiget, mit erholung der vrsachen, wie die zuuor gehort. Dar auff sich der conestabel vernhemen lassen, was das concilium belanget, durften wyr vns in zehen iaren keins versehen, aber es were gleichwol gut aller vnser selen seligheit halben, das ein gut concilium gehalten wurde; des letzten artikels halben hat er begert die gleicheit. Derhalben wyr jn vom furschlage etzlicher tausent knechte bericht, doch auff ein ratification an vnsere gnedigsten vnnd gnedigen herren zubringen, die weil wyr des von jnen keinen beuelh hetten. Dar auff er geantwurt: habt yr des keinen beuelh; jr wolt aber des kuniges gelt haben. Sagten wyr, es were vnser gnedigsten vnd gnedigen herren meinung, das das gelt solt hinderlegt werden, aber sie gedechtens nicht anderst den zw kriegs notten zugebrauchen. Dar auff der conestabel weiter geantwurt, es were ytzt fried, derhalben sie der knecht nicht bedurften; wolten wyr aber gelt ym Deutzschen lande hinderlegt haben, so musten wyr dar gegen ein gleiche summa bej einem kaufman yn Franckreich versichert auch hinderlegen. Was aber vnser abfertigung belanget, wolt er gedachten presidenten gen Schauena zu sich fordern lassen vnnd jm beuelhen, das wyr gewyslich des orts vnsern abschiedt erlangen solten. Dar auff der president ann den hoff gen Schauena gezogen, vnnd nach dem er wider gen Mulin khommen, hath er vns eben die meinung wie zuuor gemeldet antzeigen lassen durch den herrn von Amando, wylchen er desselben tages wider hin aus gen Schauena zum conestabel geschicket, vns zuuerstendigen, wen wyr an den hoff khommen solten. Als seint wyr von stundt an zum presidenten gangen vnnd gebeten, die weil vnsere vorgeschlagene mittell vnd artikel ko mat. nicht annhemlich, das doch sein mat. selbst wolte mittele furschlahen vnd schriftlich fassen lassen, wolten wyr die selbigen vnsern gnedigsten vnd gnedigen herren vberantwurten vnd furtragen; was als dan yren gnaden zw thuen, wurden sie seine mat. wol verstendigen. Aber solchs hat man vns gar abgeschlagen vnd gesagt, man wurde vns keine schryft geben. Vnd die weil der von Amando am hoffe verzohg vnd ausblieb, auch wyr glaublich bericht, das koe mat. auff den dritten tag her nach wurde aufbrechen vnd nach Blese reisen, seindt wyr semptlich hin aus gen Schauena gezogen vnd den conestabel gebeten, weil wyr nun lange dem hoff nachgezogen vnnd gehort,
