173
stas uestra ex relatione consiliariorum nostrorum uberius cognoscet, commoda ratio habeatur, et ut consiliarij nostri, qui missi sunt, quam primum ad nos cum optimis responsis remittantur. Hac re maiestas uestra non uulgariter nobis gratificabitur, et nos uicissim, quæ grata acceptaque poterunt esse maiestati uestræ, sedulo procurabimus. Quam post offitiorum nostrorum spontaneam et diligentem oblationem Deo optimo maximo seruandam diu ac foeliciter incolumem commendamus. Ex arce nostra Ellebagen uigesima die Augusti anno m° do xli. b. Christianus, Dei gratia Danorum, Noruagicorum, Gothorum et Vandalorum rex, Slesuici, Holsatiæ, Stormariæ ac Dytmersiæ dux, comes in Oldenborch et Delmenhorst, eadem illa gratia Christianissimo principi Henrico, Frantiæ Dolphino, Viennensium ac Britanniæ duci, consanguineo et amico charissimo, foelicitatem imprecatur. Christianissime princeps, consanguinee et amice charissime. Oppido quam libenter intelleximus ex literis dignationis uestræ, quod falcones missi a nobis ad uos per Ioannem Bailly sani et integri redditi sunt. Nos propter hyemem, quæ et in hijs regnis et in Germania maior quam pro more incidit sub ipsum tempus, quando aues illas misimus, in aliquo metu fuimus, ne uitij aliquid contraherent in itinere, ut sunt et pluuiæ et frigoris et niuium impatientes; quia uero in tanta aeris asperitate et inclementia nihil de uiuacitate sua amiserunt, speramus et nos futurum, quod ad exercenda aucupia non ineptum sui usum aliquando præbituræ sint, ad quod institutum dignationi uestræ suum successum uotis etiam nostris imprecamur. Præterea commendamus uobis consiliarios nostros, qui literas reddunt, uiros apprime et strennuos et nobiles, quos nos ad Christianissimum regem patrem uestrum misimus cum mandatis et negotijs, in quibus Christianissimo regi non minus quam et nobis permultum est situm, adeoque rogamus, ut dignatio uestra tractationi talium negotiorum suam etiam authoritatem interponat. Sic futurum est, ut tanto et rectius et celerius procedant. Nos uicissim dignationis uestræ caussa, quæ poterimus, et uolemus et fatiemus omnia. Quam post offitiorum nostrorum spontaneam oblationem Deo optimo maximo seruandam diu ac foeliciter incolumem commendamus. Ex arce nostra Ellebagen uigesima die Augusti anno mº dº xliº. Christianissime princeps, consanguinee et amice charissime. Reperiuntur in Germania bombardæ iaculatoriæ noui cuiusdam generis et quæ non claue sed nouo quodam modo tenduntur, cuiusmodi nos in hijs regnis non ita multas uidimus, nec scimus etiam an in Gallijs reperiantur. Proinde consiliarijs nostris unam dignationi uestræ præsentandam dedimus, quam etiam rogamus, ut dignatio uestra benigne suscipiat; nos aliud, quod hoc tempore aliqua cum nouitatis gratia mitteremus, nihil habuimus.
