225
et foelicitatem imprecatur. Illustrissime princeps, amice et affinis charissime. Venit ad nos non ita multis diebus elapsis dominus de Cruce a Christianissimo rege missus orator. Qui cum negotia sua, quæ ad nos deferenda habuit, qua debuit diligentia exposuisset, nomine celsitudinis uestræ quam humaniter nos salutauit et a nobis expetijt, ut celsitudinem uestram equis duobus Germanico more instructis donaremus, præterea uero, ut bombardam, quam promisimus, celsitudini uestræ transmitteremus, et adiecit, quod celsitudo uestra rogaret, ut uoti sui, quod ad equos et bombardam attineret, primo quoque tempore compos fieri posset. Nos uero, qui celsitudini uestræ ex animo fraterno bene consultum cupimus, dictam nobis salutem libenter acceptauimus iussimusque, ut dominus de Cruce celsitudinem uestram non solum de reddita a nobis gratia pro communicata salute certiorem faceret, uerumetiam ut ex parte nostra celsitudini uestræ obsequium nostrum cum reprecatione foelicitatis et ualetudinis bonæ deferret; quod ad equos attinet, operam dedimus, quantam potuimus in hac festinatione, ut duos quam selectissimos exquireremus, quos celsitudini uestræ instructos Germanico more, ut etiam bombardam promissam transmittimus, et rogamus ut celsitudo uestra, quod mittimus, boni facere atque consulere uelit. Si qua in re præterea celsitudini uestræ obsecundare poterimus, libenter, quod offitij nostri erit, fatiemus. Hijs paucis celsitudinem uestram Deo optimo maximo seruandam diu ac foeliciter incolumem commendamus. b. Domino de Longueual de equis, qui mittuntur ad ducem Aurelianensem. Christianus Dei gratia Danorum, Noruagicorum, Gothorum et Vandalorum rex, Slesuici, Holsatiæ, Stormariæ ac Dytmersiæ dux, comes in Oldenborch et Delmenhorst, generoso et magnifico uiro domino de Longeual, Christianissimj regis consiliario et domus magistro ordinario, syncere dilecto, salutem dicit. Generose et magnifice uir. Dominus de Cruce, Christianissimj regis orator ad nos missus, nobis exposuit, quod illustrissimus princeps dux Aurelianensis, affinis et amicus noster charissimus, a nobis expetierit, ut equos duos Germanico more instructos quamprimum sibi transmitteremus. Itaque ministrum nostrum, qui has literas reddit, cum equis duobus ad ducem Aurelianensem ablegauimus, et rogamus, ut uos cum illustrissimo duce Cleuiæ rationem inire uelitis, per quam fieri possit, ut equi tuto ad ducem Aurelianensem peruenire queant. Hac in re et duci Aurelianensi gratificabiminj et nos non uulgariter uobis conciliabitis. Datæ ex Wyburgo nostro ix die Junij ano etc. m. d. xxxxii. Valete. E chartis primæ scriptionis Petri Suauenii. Die 29 Junii anni 1542 Carolus V scribit, Gallum operam dedisse, ut e Dania quoque milites conquireret (Lanz: Korrespondenz Kaisers Karl V vol. II pagg. 346- 349). In instructione, Thomæ Thirlby episcopo Westmonasteriensi, ad cæsarem legato, die 1 Julii data,
