243
richten, wo vnsere hendele staen, vnnd dath wy ein groeth heer by einander hebben, darmede wy by vyff myle weges na by vnserem viende liggen, rha pende dath wy ene ock wedder synen willen tho einer slacht balde nodigen vnnd dwingen willen, edder ock dath he myth den synen wedderumme tho rugge tehen schale; vnnd yss vnsers erachtens nicht magelick tho dysser tydt eine betere wise thofinden densuluigen viendt thouerhinderen, dath he jw keinen schaden dhoen mage, alse dath wy ehm hyr thoschaffen vnnd tho donde geuen. Wy willen auersth hyrmede wedderhalet hebben, dath wy ock lestmals an jw geschreuen, nhomelick dath wy vnns tho allen tyden der gebor holden willen vnnd vnns also stercken, dath wy dorch solcke vnsere sterckinge verhoden magen, dath vnser gemeine viendt jw yn keinem orde juwes koningrykes schaden doen kane, vnnd dath wy vnsers deels gentzlick holden vnnd bewaren willen den tractat van buntnysse vnnd fruntschop, so tuschen vnns vpgerichtet vnnd gemaket yss. Vnnd so ydt kamen scholde (dar van doch noch keine dechtnisse geschehen, ock sueth ydt nicht daer na vth), dath vnns de keiser vmme frede anlangende wurde so willen wy noch frede noch anstandt maken, darynne gy nicht schalen begrepen werden, vnns verhapende, gy werden juwes deeles ock datsuluige donde, dath gy noch frede noch anstandt maken, sonder vnns dar ynne begripen. Wy finden ock vp billige wege gestellet de antwurth, de gy vnserem ambasaten deme Richer vnnd deme ryngrauen gegeuen, alse dat de gelegenheit nhw nicht yss, ock nicht de tydt, eine vheide antofangende, vnnd dath ydt guet synn scholde eine betere beqwemicheit dar tho erwachten, dartho denne dysse winter denstlick synn werdt eine gode bedacht tho nhemen, dath iegen dath voriare ein angreep iegen vnseren gemeinen viendt gedaen werden mage, dar tho wy alle vnsere gewalt tho allen tyden gernne gebruken willen. Ock willen wy nicht vergeten jw tho schriuen, dath dath gelt, welckere wy bedacht jw thoschicken einen angreep dar mede tho donde, yss lenger alse soss wekene tho Strasborch gewesen vnnd dar na gelegen, dath gy ydt scholden halen laten; vnnd darvmme dat man keine tydinge van jw gehat, so sindt daer van veftich dusent cronen ynt lant tho Cleuen geschicket worden tho deme herren van Mandosse, dath he solcke veftich dusent cronen fernner beth an jw schicken scholde, so gy ein heer tho velde liggende hedden, edder ock suss dath gelt tho nutte iegen vnsern gemeinen viendt woll anleggen konden; welckere gelt dorch den hartogen van Cleue genhamen vnnd beholden yss worden daer na, alse de handell tuschen ehm vnnd deme keisere gemaket gewesen, also dath de hartoge van Cleue nicht tholaten wolde, dat datsuluige gelt yn des gemeltten ambasaten hende kamen mochte. Vnnd bidden hyrmyth, dorchluchtige grotmechtige furste, vnser geleueder broder, blodes vnnd bondes verwantte, dath Godt jw gnedichlick behoden vnd bewaren mage. Geschreuen tho Fere vp der Ocze den xxjten dach Octobris anno etc. ym xliijten. Skrevne med Peder Svaves Haand. IV B. 3 H. (1868). 31
