321
Enns vnd zu Burgaw, herr zu Frieszlannd, auf der Wynndischen march, zu Mechln, zu Portenaw vnd zu Salins etc., bekennen, daz vns der durlewchtig Johanns, kunig zu Dennmarkht, Norwegen, Sweden, der Wennden vnd Gotten kunig, hertzog zu Sleswigk, zu Hollnstein, Störmarñ vnd der Dietmerschen, graue zu Aldemburg vnd Delmanhorst etc., vnser lieber bruder vnd furst, mitsambt den geistlichen vnd weltlichen reten seiner liebe kunigreich Dennmarkh vnd Norwegen haben anbringen lassen, wie die rēte vnd einwoner des berurten kunichreich Sweden sich wider jr eydsphlicht, die sy seiner lieb getan, aus vngetrewer bewegnuss seiner lieb sloss Stokholm, in demselben kunigreich Sweden gelegen, mit heres krafft belegert, vnd darinnen die durlewchtigen Cristina vnnser liebe swester seiner liebe gemahel solanng behawrt, bis die gemelten Swedner dasselb sloss erobert, jr lieb nachmalen gefenngklich angenommen, ettwe uil zeit gefenngklich gehallten vnd nachmalen sein lieb desselben reichs auch aller nutzung vnd zugehörung rawblich entsetzt vnd entwert haben. Vnd wiewol sein lieb sölch vngehorsam, vntrew vnd misshanndlung widerumb mit der tat zustraffen furgenomen, so hieten doch die vorgenannten Swedner sölich jr vnzimlich hanndlung selbst vnd die straff, so billichen darauf volgen möcht, zuhertzen genommen, vnd darumb die vorgenannten geistlichen vnd weltlichen rēte des berurten kunigreichs Dennmarkh durch jr trefflich potschafft mit dem höchsten betlichem vleiss ersucht sein lieb zuerbitten, sölch jr hanndlung fur sy vnd das kunigreich Norwegen rēte lautt der vertrēg, so vor lanng verschiner zeit zwischen seiner lieb vnd jrer vorfarn kunigen vnd der berurten kunigreich Dennmarkh, Norwegen vnd Sweden aufgericht worden, zu rechtlichem austrag zukummen stattun, des sein lieb aus angebornner gute vnd als ein liebhaber des fridens vnd rechtens vervolgt vnd sich daran benugen lassen. Darauf die obgemelten Swedner vnd sonnderlich die haubtsacher sich bey jren eren, trewen vnd Cristenlichem gelauben vnnder des reichs Sweden jnnsigl, clem genannt, vnd jren vnd annder jnnsiglen verschriben, den angesetzten vnd benennten rechttag in die stat Calmar, in dem bestimbten kunigreich Sweden gelegen, on ferrer waygrung nachzukumen. Vnd so nw sein lieb sich zu yetzgemeltem rechttag gen Calmar gefugt, vngezweiflter zuuersicht, die genannten seiner lieb vngehorsamen vnnderthanen solten auf denselben tag in crafft irer verschreibung, glubd vnd verpflichtung daselbs vor gericht auch erschinen sein, dieweil aber dieselben vber jr verschreibung, glubd vnd verpflichtung, menig erfordrung vnd offennlichen beruffung zuuergessung vnd nachtail jrer trew vnd eren vngehorsam vnd sy noch nyemannd anndere von jren wegen mit genugsamen gewallt fur gericht nicht komen, hiet sein lieb vor den obgemelten geistlichen vnd weltlichen rēten der kunigkreich Dennmarkh vnd Norwegen als richtern nichtmynnder jr klag, wie zu recht gepurt, gegen denselben seinen widersachern gesetzt vnd darauf rechtens begert. Daselbst sey durch die yetzgenannten rête als richtern samentlich zu recht erkannt,
