408
coram eo jnsinuauit notificauit et jnhibuit, ac eosdem exaduerso principales citauit, aliasque et alia fecit, prout in eisdem literis citatorijs et jnhibitorijs plenius continetur. Eciam dicte litere jnhibitorie per notarium publicum fuerunt specialiter presentate et jnsinuate dicto domino archiepiscopo Lundensi, ne ipse aut suus collega dictus dominus episcopus Lincopensis, ad quem tutus non patebat accessus, quia in Swecia, quare per edictum illi fuit jnhibitum, de premissis aut aliquo premissorum ignorantiam pretendere valerent seu quomodolibet allegare, prout constat jn actis consequenter memoratis. Tunc dominus episcopus Ratzeburgensis, in vim dictarum literarum aliquali continuato processu, ad longinquas partes, quia Romanam curiam, proponens se transferre, causam et causas huiusmodi resumendas et vlterius cognoscendas ac terminandas jn vim specialis commissionis, cuius tenorem etc. pro expressis haben, egregio decretorum doctori domino Alberto Maken ecclesie Ratzeburgensis canonico et cantorj duxit committendas. Qui illis in statu debito resumptis, seruatis seruandis, ad suam diffinitiuam et adiudicatoriam cum fructuum et expensarum condempnacione sentenciam, dicta castrum, opidum ac bona alia jn actis designata jpsi domine regine adiudicando procedendum duxit, jn scriptisque tulit et promulgauit. Que nulla prouocatione suspensa jn rem transiuit judicatam, literis executorialibus desuper decretis subsecutis, ac illis consequenter per edictum publicum in locis deputatis contra ipsum Stenonem et alios dictorum bonorum detentores et occupatores diligenter executis. Jnterim prefato domino episcopo Ratzeburgensi ad partes et dictam suam ecclesiam redeunte, huiusmodi causas reassumpsit, ac pretactis executionibus dictarum literarum executorialium coram eo judicialiter exhibitis, seruatis seruandis, ad suam declaratoriam sentenciam ob non paritionem ipsarum literarum executorialium processit, ipsum Stenonem et alios occupatores aduersarios antedictos excommunicacionem aliasque sentencias et censuras in dictis literis executorialibus contentas dampnabiliter jncidisse et jncurrisse in multiplicem eorum contumatiam, declarando et tales denunctiarj mandando literasque desuper necessarias decernendo et concedendo, prout consequenter ad omnium et singularum penarum et censurarum vsque ad jnuocationem auxilij brachij secularis jnclusiue per eundem procedetur. E charta primæ scriptionis, cui inscriptum est: "Informacio in causa regine exponenda sanctissimo domino nostro." Anno 1488, mense Majo, Dorothea regina, tunc Romæ degens, binas litteras apostolicas impetrauit, alteras ad dominum Stenonem directas, vt ipsis litteris visis lectisque castrum Örebro etc. eidem reginæ continuo sub excommunicationis poena redderet (Svaningii Refutatio calumniarum cuiusdam Ioannis Magni etc., 1560, 4to, fol. Q 3v, cfr. Q 4v), alteras executoriales, ad archiepiscopum episcoposque Suecos scriptas, vt dominum Stenonem ob detentionem dicti castri (ǝ: si dictum castrum pertinax detineret) excommunicarent (Olaus Petri in Script. rer. Svec. I. 2. 327). Vtrasque litteras pridem periisse verisimile est, quum jam Hvitfeldius ipsas tractans (pag. 998) modo scriptis jam allatis Svaningii et Olai Petri vsus esse videatur, non ipsis litteris. Cæterum, Olao Petri autore, excommunicatio ista promulgata non est, sed dominus Steno ab executoribus dilationem nactus intermedio tempore caussam suam Romæ egit; ibique etiam die 16 Septembris 1488 reuera diuersam a prioribus litteris apostolicis bullam impetrauit (cfr. infra nr. 16).
