191
52. Lichtenstern til Griffenfeld. Warsovie ce 818 du may 1674. Monseigneur. Ie me donne l'honeur d'escrire à vostre excellence, mais ie prends cette liberté par ordre de monsieur Sestedt. Les prieres eternelles jointes à de menaces et enfin la violence, qve les affectionés luy ont faict de se monstrer publiqvement au cercle (c'est à dire à l'assemblée de la noblesse), l'ont persvadé à la fin de demander l'audience publiqve, la qvelle luy ayant esté accordée pour aujourdhuy avec les mesmes ceremonies, qv'on feroit à un grand ambassadeur, a esté interrompue par l'accident d'une indisposition impourvue, qvi l'a pris hier au soir de telle sorte, qv'il a esté obligé de chercher le lict, qv'il garde encore a present. Il se faict pourtant un dernier effort pour escrire à sa majesté, mais je ne sçay, si sa mauvaise santé luy voudrà accorder assez de temps et de force pour pouvoir achever une relation entiere. Pour ce qvi regarde la personne de vostre excellence, il la soupplie treshumblement de ne pas trouver mauvais, qv'il luy escrit par la main d'autruy; il me semble pourtant, qv'une excuse comme la sienne est trop legitime pour ne pas satisfaire à vostre excellence. Quant aux affaires publiqves, i'ajouteray icy une partie de ce qvi se passe. Hier monsieur Strachman, ambassadeur de Neubourg, a eu audiance publiqve; il a esté accompagné magnifiqvement au cercle comme les autres ambassadeurs aussi, c'est à dire: il y avoient jusqves à 40 carosses à 6 chevaux et plus de 3-400 cavaliers à cheval avec autant de valets, outre cela les trompettes et tymbales, qvi faisoient assez de bruict par la ville. Il a offre à la republiqve la somme de 4 millions pour le payement de l'armée, et de lever et entretenir à ses depens 6000 hommes d'jnfanterie pour le service de la republiqve, proposant les rois de France et de Svede pour cautionnaires de ces offres ou des marchands de Dantzig et Hambourg, s'il plaisoit ainsy à la republiqve. Les ambassadeurs de Loraine font le mesme touchant la caution des marchands, qvi ne vient pas en consideration parmy la noblesse. Hier l'on a entendu la relation de la conference, qve les deputés de la noblesse ont eu avec le nonce de Rome: elle consistoit en ce qv'il y avoit 140000 florins icy en ville, dont sa sainteté faisoit present à la republiqve, si elle prendroit un roy verè catolicum, et qv'au contraire il avoit ordre de ne rien donner. · Demain monsieur l'ambassadeur de Brandebourg aurà audiance; on ne peut sçavoir ce qv'il proposerà. On croit qve l'election, qvi se devoit faire demain, serà prolongée jusqve a mecredy. Vostre excellence voit icy ce qv'on peut mander par cette poste. Au reste ie finis avec asseurance, qve ie seray toute ma vie, monseigneur, de vostre excellence - le treshumble et tresobeissant valet S Egenhændig. C. Lichtenstern.
