346
49. Van Haueren to methen. Hauer, dede kumpt van deme Dorpe unde twisschen Sleszmynne, den scal men in de Mathe eynsstoten; men de van buten kumpt, scal men meten ane Stotent. 50. Van Wyn-Mathe unde Beer-Mathe. 43) Eyn Wiff, de eyne Krogerssche is, edder eyn Wyntapper, de unrechte Mathe hefft, de scal he breken, unde geuen deme Konynghe IX Schillinge, unde der Stad ok so vele betalen. 51. Van valscher Mathe. De wart begrepen myt unrechter Mathe, also Scip, Scepel, unrechter Eelen unde unrechter Wachte, de entbere des Houedes unde al synes Gudes. 52. Van Scepelen unde Sceppen to likenen. Alle Scepele, ifte Scip, dreghe men vor den Rad, und late ze likenen, unde bernen myt der Stad Iseren. 53. Van Honighe tho methen. Wan Honinch to der Stad kumpt to kope, dat scal men meten myt eyner kopperen Mathe, behalu en de vullen Tunnen. 54. Van Voerkope. We deme anderen Vorkop deit, de betale der Stad III Mark. 55. Van Kopenscup der Knakenhouweren. Oft eyn Knakenhouwer Qweck kopen wille, unde eyn Borger darbi sii, deme des Behoff is, de geue deme Knakenhouwer vor syn Arbeyt I Schilling, unde neme dat Rint to sick; vor dat Swyn VI Peninghe, unde vor dat Scap VI Penninghe. 56. Van Betalinge, Huszhüre unde Erthüre. Alle dede sitten in eynes andern Husz, ifte Erden, de betalen oren Tyns ifte Hüre to rechten Tiiden, edder he betalen ok III Mark. 43) Cap. 36 AS.
